السبت، 9 أبريل 2016

وداعا للاظافر الضعيفة والمتشققة


الاظافر: لازم تعتنى باظافرك لتكون مهندبة ومبرودة وقوية وغير متقصفة وشكلها جميل ونظيفة وزى الفل عليكى القيام بالاتى : 

ماسك لتغذية الاظافر
بنسب متساوية من عصير الليمون+ زيت النعناع+ زيت الافندر ووضعهم فى زجاجة صغيرة ويتم دهن وفرك كل ظفر بالماسك ده 3 مرات بالاسبوع 

العناية بالأظافر
كل البنات بتبقى نفسها اظافر طويلة ونظيفة ومش بتتكسر ولا تتشقق
حتلاقى الحل معى :
الحل هــــو:
1) برد الاظافر بالمبرد بس يفضل مبرد خشبى مش معدنى تبردى اظافرك فى اتجاه واحد بالمبرد مش رايح جى عشان كده بيضعف الظفر اى تمسكى المبرد وتبردى من نحية اليمين الى منتصف الظفر ومن نحية الشمال الى منتصف الظفر فى اتجاه وااحد
2) وانتى بتغسلى المواعين وتسي ئى الارضية تحاولى تلبسى جونتى عشان يحمى اظافرك ويديكى خصوصا من الكيماويات مثل الكلور وبتبقى الاصابع من كتر غسيل المواعين تحسى الجلد فيها مكشكش مع ترطيب اليدين الكشكة دى حتروح ان شاء الله ولبس الجوانتى حاولى تتعلمى تلبسى جوانتى لان فى بنات صعب انها تتعامل بالجوانتى بس اتعلمى وشكلها غير ظريف وبعد المواعين لازم ترطبى يديكى واظافرك
3) سنفرة للأظافر عبارة عن ملح + سكر بنسب متساوية + ليمون وتقلبيهم جيدا وتضعيهم على كل ظفر باستخدام فرشة اسنان قديمة وتفرشى كل ظفر بالسكرب ده وتسبيه لمدة 10 دقائق ع الظفر ثم تشطفى اظافرك بالماء
ملحوظة هاااامة السكرب ده ينفع تعمليه للايدى والارجل والأظافر والجسم وللبشرة الدهنيه والمختلطة فقط وبتحسى بالفرق من اول استخدام والله تسبيه ع الايدى والأظافر لمده 10 دقائق وع الجسم لمدة من ربع الى نص ساعه وع البشرة الدهنيه والمختلطه لمدة 10 دقائق ممكن تجبيه كتجربة على يد واحدة فقط وحتحسى بالفرق مزايا سنفرة الملح والسكر والليمون ازالة الجلد الميت وتنعيم وتفتيح
4) وصفات لتقوية الأاظافر :
* تمسكى نص ليمونه وتدعكى بها فى كل ظفر وتسبيه تنشف
* تدفى زيت زيتون ع النار ازاى طريقة تدفئة اى زيت تمسكى طاسه وتدفيها ع النار وتشليها من ع النار ثم تضعى زيت الزيتون حيدفا تنقعى اظافرك به لمدة لابع ساعه ثم تعملى مساج للظفر عشان يتشرب زيت الزيتون فى حركات دائرية
* لو دعكتى الظفر بالثوم شوية وعشان رائحته تروح بعد كده تدعكى اظافرك بالملح الخشن عشان تشيل رائحة الثوم
* وضع زيت الخروع على كل ظفر
الوصفات تقوية الاظافر تعمليها من مرتين الى 3 مرات بالاسبووع
5) لا تبردى اظافرك وهى مبلولة عشان بتبقى ضعيفة

الأربعاء، 6 أبريل 2016

هتفضلى عروسه معانا طول العمر


متجوزه وعندك ولاد ومش لاحقه تعملى حاجة لنفسك. تعالى معايا
طبعا بعد الجواز وقتك مش بيبقى ملكك خصوصا كمان لو عندك ولاد بيخلوكى تشدى فى الشعرتين اللى حيلتك باشد ف شعري لحد ما قربتى تبقى صلعه باضحك
وجوزك طبعا مش فالح الا فى المعايبه والتريقه ويقعد يغيظك بالمغنيات من امثال هيفاء ونانسى 
ويقعد بينه وبين نفسه يغنى (غلطه وندمااااااان عليها) باضحك
طب ليه متبقيش زيهم ؟؟ خليه لما يشوفك ميقدرش يشيل عينه من عليكى
تعالى معايا هنتفق على حاجه
عندك 4 حالات انتى واحده منهم
1- مش عندك اولاد - ربة منزل
2- مش عندك اولاد - بتشتغلى
3- عندك اولاد - ربة منزل
4- عندك اولاد - بتشتغلى
الحاله الاولى : بتبقى قشطه وقتك كله ملكك جوزك ينزل الشغل من هنا وانتى تجرى على التواليت من هنا تاخدى الشاور وتحطى الكريمات و و .. وتظبطى نفسك ولما يرجع يلاقيكى باشا
الحاله التانيه : اصعب شويه ان هو هيبقى فى الشغل وانتى كمان فى الشغل وطبعا لما ترجعى يادوب تعملى الاكل وتاخدى شاور بالعافيه وتاكلوا وتتفرجوا على التليفزيون بليل شويه وتناموا .. وبس خلص اليوم على كده
الحاله التالته : الاولاد بيكونوا شرفوا وطول الليل عياط وتفضلى تأكليهم وتغيريلهم وطالع عينك طول النهار ورابطه العصبه المتينه فوق نفوخك وعماله تبلبعى فى برشام صداع وجوزك يجى يطلبك بليل تبقى عايزه تديله بوكس فى وشه ناقر ونقير وتفتحى الجاعوره التمام
وهو يقول فى نفسه انا شكلى اخدت مقلب واتجوزت واحد صاحبى
ولو ولادك كبروا شويه وابتدوا يلعبوا فى كل حاجه ويجروا ورا بعض بيبقوا عايزين حد عينه عليهم 24 ساعه وانتى طبعا تجرى ورااااااااااهم بالشبشب واديله ادى طاخ طوخ ومش لاحقه تستحمى طبعا وياسلام بقى كمان لو ريحتك بصل وتوم وجوزك يروح من الشغل ياكل ملوش دعوه بحاجه ويديكى قفاه وينام انا باغلي
الحاله الرابعه : اصعبهم ودى بقى بتشتغلى وعندك ولاد بتروحى تلقحيهم عند مامتك الصبح وترجعى تاخديهم وانتى راجعه من الشغل وطبعا لما تروحى نفس الموال
تطبخى وتحضرى عشان جوزك يجى يطفح وينام زى البغل ومش همه حاجه
طب ليه منهتمش بنفسنا ولو يوم واحد فى الشهر تفضل اثاره معاكى الشهر كله
هتلاقى نفسيتك بقت احسن وجوزك عينه مش هتنزل من عليكى
طب هنعمل ايه ؟؟
خصصى لنفسك يوم واحد فى الشهر يبقى ملـــــــكــــــــــك انتى بس
متهيألى يوم واحد فى الشهر مش كتير وحتى لو معندكيش وقت او وراكى 100 حاجه هتقدرى تفضى نفسك يوم ويستحسن يكون اليوم ده اول ما البيريود تخلص
طيب لو عندى ولاد ؟ زحلقيهم على مامتك اليوم ده يباتوا عندها
ولو اعده فى البيت ؟ اختارى اى يوم يكون جوزك فى الشغل عشان يرجع يتفاجأ
طب لو بشتغل ؟ اختارى يوم يكون جمعه زى بعضه وحاولى تزحلقيه هو كمان عند حد من صحابه اهو منه يفك عن نفسه شويه ومنه يرجع ينبهر من شكلك
طبعا هيقولك بتزحلقينى ليه ؟ قوليله انهارده ده ملكى انا بس عايزه اهتم بنفسى وببشرتى مش معنى انى اتجوزت انى اهمل فى نفسى .. واتفقى معاه على معاد يرجع فيه عشان تتعشوا سوا
طبعا هو هينشكح من الكلمتين دول سعيدة قوي ويقول بينه وبين نفسه ايه ده ! هى الوليه مالها باضحك وهينزل اوام وهيبقى نفسه يرجع بسررررررررعه عشان يشوف القمر اللى مستنيه ابتسامة
طيب زحلقنا جوزك وولادك هنعمل ايه بقى ؟؟
صلى على النبى الاول .. زيدى النبى كمان صلاه
اول حاجه هنسمى بالله ونستعيذ من الشيطان الرجيم ونجرررررى على الحمام
تانى حاجه هتاخدى شعرك فومين قصدى تعمليله حمام زيت وتسيبيه على شعرك وتحطى عليه الكيس البلاستيك عشان الزيوت متقعش على الجسم وتبوظ الدنيا
وتحضرى معاكى (صابون مغربى + حنا بيضاء للجسم + ليفه مغربيه)
دى صورة الصابون المغربى (الاصلى) اوعوا تتغشوا فى التقليد
لحنا البيضا
متجوزه وعندك ولاد ومش لاحقه تهتمى بنفسك .. تعالى معايا
ودى بقى الليفه المغربى
متجوزه وعندك ولاد ومش لاحقه تهتمى بنفسك .. تعالى معايا
وتبتدى تعملى الحمام مغربى وده سهل مش صعب وياريت لو تكونى معوده نفسك عليه قبل الجواز هيبقى اسهل كتيـــــــر
هتملى الحمام بخار وتقعدى فى الميه السخنه 10 دقايق وتطلعى تدعكى جسمك بليفه مغربيه (اللى بتبقى نقعاها فى ميه سخنه هى كمان) هتلاقى الجلد الميت والبلاوى كلها بتطلع
(دى طريقة ام نوريه) اه الامانه حلوه برضه احلى ابتسامة
وبعدين تدهنى جسمك بـ (صابون مغربى مضاف اليه حنا بيضه للجسم) وتسيبيهم 10 دقايق على جسمك
تكونى عملتى لوشك سكراب مقشر بسكر وزيت زيتون هينضف البشره ويشيل الجلد الميت منها ولو عندك ماسك للوش حطيه يرطب .. معندكيش حطى ماء ورد ساقع هيقفل المسام المفتوحه ويطرى البشره وينضفها
وبعدين تبدأى تدعكى الجسم بالليفه المغربيه تانى من تحت لفوق زى اغنية المرجيحه كده باضحك
وبالمره ادى رجلك دعكه بالحجر مش هتخسرى حاجه الكعب يا عينى بيستوى مننا طول الشهر
تمام دعكنا وخلصنا والجسم بقى فله وبيبرق من النضافه تدخلى تتشطفى وتنشفى جسمك كويس اوى
* بس خلى الزيت على شعرك كل ما المده تطول كل ما يكون احسن *
وبعدين تعملى سويت وتعيدى عليها بالمكنه سيلك ابيل وتشيلى كل شعرايه فى جسمك (مهى حوماية العيد بقى) باضحك
ملحوظه : اوعى تعملى السويت قبل الحمام لان الليفه المغربيه بتبقى خشنه على الجسم وقبلها كمان سويت جسمك مش هيستحمل
وحتى لو جلدك مش حساس عشان الشعر اللى تحت الجلد لما يطلع تشيليه بالمره وانتى بتعملى
تمام خلصنا هتدخلى تحت الدش تتشطفى وتغسلى شعرك وتمام اوى كده
وتدهنى جسمك يا اما بتلج يا ماء ورد ساقع عشان يقفل المسام المفتوحه وميدخلش فيها تراب
وكملى جميلك وادهنى جسمك بزيت او كريم نبات السعد عشان يقلل ظهور الشعر
وفى كمان طريقه لتعطير الجسم (ام نوريه) قالت عليها ربنا يجازيها كل خير يارب
بتخلى ريحة الجسم تحفه لمدة شهر هحط لينك الموضوع هنا بعد اذنها
طريقتى فى تعطير وتبخير جسمى وشعرى زى الخليجيات حتخلى زوجك يلزق فى البيت بصور نسرين و
تمام استحمينا ونضفنا جسمنا وحطينا الكريمات وريحتنا بقت جميله ومفحفحه وضاربه لاخر الشارع
هتلاقى نفسك همومك كلها نزلت مع الحمام ده وهتحسى نفسك اخر دلع وجمال وجسمك كله بياض ونعومة 
وتضربى هيفاء ونانسى وروبى بالشبشب الزنوبه اللى هاريه بيكى ولادك ده باضحك
هتلبسى بقى وتتشيكى وتحطى البارفان وتستنى معاد جوزك وتكونى موضبه العشا المتين هيرجع طبعا مش هيصدق نفسه من حلاوتك وعينه هتخرج عليكى انا مييييين هتتعشوا وبعدين يقولك يلا ننام وطبعا مش هيسيبك تنامى باضحك
وبجد هتشوفى فرق المعامله مع جوزك ولما تطلبى منه حاجه هيعملها ولا لأ واد ايه هيخاف على زعلك
نصايح سريعه :
1- حطى دايما مع الاكل (طبق سلطه) وانزلى عليه الاول قبل ما تاكلى هيشبعك بحيث انك متكتريش فى الاكل وتفضلى محافظة على جسمك
2- بعد ما تتغدى اضربى كباية شاى اخضر (وياريت من غير سكر) هتخسسك من غير مجهود وهتنضف الجسم من السموم وهتحافظ على بشرتك

3- هاتى كريم جليسوليد وحطى عليه لمونه ونص او لمونتين واخلطيهم كويس .. وادهنى كل يوم قبل ما تنامى (الكوع - الركب - كعب الرجل) واى منطقه ناشفه او سمره فى جسمك هتلاقيها طريت وبقت منوره من البياض موافقة
4- قبل ما تنامى هاتى قطنه وحطى فيها ماء ورد وامسحى وشك خصوصا لو كنتى حاطه ميك اب هينضف البشره جدا ويشيل اى اثار للمكياج ده غير فوايده للبشره